ភ្នំពេញ ៖ សម្តេចពិជ័យសេនា ទៀ បាញ់ បានបញ្ជាក់ថា ការចាក់វ៉ាក់សាំងសម្រាប់ប្រជាជនរស់នៅក្នុងតំបន់ក្រហមក្នុងភូមិសាស្ត្ររាជធានីភ្នំពេញនឹងចាប់ផ្តើមនៅថ្ងៃទី០១រហូតដល់ចន្លោះថ្ងៃទី១៧ ខែឧសភា សម្រាប់ម្ជុលទី១។ សម្តេចពិជ័យសេនា បានរំពឹងថាការចាក់វ៉ាក់សាំងសម្រាប់ម្ជុលទី២ គឺលឿនជាងម្ជុលទី១ ហើយអាចនឹងបញ្ចប់នូវយុទ្ធនាការចាក់វ៉ាក់សាំងក្នុងតំបន់ក្រហមនេះក្នុងរយៈពេល១ខែ។
រដ្ឋមន្ត្រីការពារជាតិ សម្តេចពិជ័យសេនា ទៀ បាញ់ បានបន្តថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់បទបញ្ជាឱ្យក្រុមគ្រូពេទ្យនៃអនុគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្រសួងការពារជាតិចុះចាក់វ៉ាក់សាំងជូនប្រជាពលរដ្ឋ កម្មករ និយោជិកអនិកជន ជនបរទេសនៅខណ្ឌមានជ័យ ខណ្ឌពោធិ៍សែនជ័យ ខណ្ឌកំបូល និងខណ្ឌដង្ការ ក្នុងរាជធានីភ្នំពេញ។
សម្តេចពិជ័យសេនា ទៀ បាញ់ បានរំលេចថា ថ្ងៃនេះយើងប្រែក្លាយថ្ងៃប្រារព្ធទិវាពលកម្មអន្តរជាតិប្រចាំឆ្នាំ ទៅជាយុទ្ធនាការជាតិចាក់ វ៉ាក់សាំងនៅក្នុងតំបន់ក្រហម ដែលជាតំបន់កំពុងមានការឆ្លងរាលដាលជំងឺកូវីដ-១៩ នៅក្នុងរាជធានីភ្នំពេញ៕
ព័ត៌មានជាច្រើនទៀតសម្រាប់អ្នក
